ИХЛОС СУРАСИ

Ихлос сураси 4 оятдан иборат бўлиб, Маккада нозил бўлган. Бу суранинг “Ихлос” деб номланганининг сабаби, унда Аллоҳ таоло бандаларини фақат Ўзигагина ибодат қилишга, Ўзигагина юзланишга ва ихлос қилишга ундаганидир.

بِسْمِ اللّٰهِ الرَّحْمٰنِ الرَّح۪يمِ

РАҲМОН ВА РАҲИМ БЎЛГАН АЛЛОҲ НОМИ БИЛАН

قُلْ هُوَ اللّٰهُ اَحَدٌۚ (١)

1. Эй Муҳаммад: “У Аллоҳ ягонадир”, – деб айтинг.

اَللّٰهُ الصَّمَدُۚ (٢)

2. Аллоҳ беҳожат, лекин ҳожатбарор бўлган Сомад Зотдир.

لَمْ يَلِدْ وَلَمْ يُولَدْۙ (٣)

3. У туғмаган ва туғилмаган ҳам.

وَلَمْ يَكُنْ لَهُ كُفُوًا اَحَدٌ (٤)

4. Шунингдек, Унга ҳеч ким тенг ҳам бўлмаган.

Изоҳ: Ихлос сурасининг фазилатлари ҳақида кўпгина ҳадиси шарифлар мавжуд. Зеро, унинг мазмуни тавҳидга, яъни Аллоҳнинг зоти ягона экани, Унинг сифатлари комил бўлиб, бандаларининг сифат ва хусусиятларидан тубдан фарқ қилиши тасвирланган. Мазкур ҳадисларда бу сура Қуръони Каримнинг учдан бирига тенглиги, уни қироат қилиш жаннатийлик сабаби экани каби башоратлар бор.