ТИН СУРАСИ

Тин сураси 8 оятдан иборат бўлиб, Маккада нозил бўлган. Бу суранинг номи ҳам ўзининг биринчи сўзидан олинган. Аллоҳ таоло бу сурани “Тин”, яъни анжир билан қасам ичиш билан бошлагани учун ўша калима унга ном бўлиб қолган.

بِسْمِ اللّٰهِ الرَّحْمٰنِ الرَّح۪يمِ

РАҲМОН ВА РАҲИМ БЎЛГАН АЛЛОҲ НОМИ БИЛАН

وَالتّ۪ينِ وَالزَّيْتُونِۙ (١)

1. Анжир ва зайтунга қасам бўлсин.

وَطُورِ س۪ين۪ينَۙ (٢)

2. Сийно тоғи билан қасам бўлсин.

وَهٰذَا الْبَلَدِ الْاَم۪ينِۙ (٣)

3. Мана шу тинч-осойишта Макка шаҳрига қасам бўлсин.

لَقَدْ خَلَقْنَا الْاِنْسَانَ ف۪ٓي اَحْسَنِ تَقْو۪يمٍۘ (٤)

4. Ҳақиқатан, Биз инсонни энг гўзал тузилишда яратдик.

ثُمَّ رَدَدْنَاهُ اَسْفَلَ سَافِل۪ينَۙ (٥)

5. Сўнгра қариган сари, уни асфала софилинга қайтардик.

Изоҳ: Оятдаги асфала софилин – пастларнинг пасти. Бу сўздан икки хил мазмун олиш мумкин. Биринчиси, таржимадаги қарилик бўлса, иккинчиси кейинги иймонли солиҳ бандаларга бериладиган неъматлар зикри далолатига биноан иймон келтирмаган мунофиқлар дўзахнинг паст жойига юборилишига ишорат бўлиши мумкин.

اِلَّا الَّذ۪ينَ اٰمَنُوا وَعَمِلُوا الصَّالِحَاتِ فَلَهُمْ اَجْرٌ غَيْرُ مَمْنُونٍۜ (٦)

6. Фақат, иймон келтирган ва яхши амалларни қилганларга битмас-туганмас ажр бордир.

فَمَا يُكَذِّبُكَ بَعْدُ بِالدّ۪ينِۜ (٧)

7. Бас, эй инсон! Шундан кейин жазо кунини ёлғонга чиқаришга сени нима мажбур этмоқда?!

اَلَيْسَ اللّٰهُ بِاَحْكَمِ الْحَاكِم۪ينَ (٨)

8. Ахир, Аллоҳ ўша кунда ҳукм қилувчиларнинг энг адолатлиси эмасми?!