ҲУМАЗА СУРАСИ

Ҳумаза сураси 9 оятдан иборат бўлиб, Маккада нозил бўлган. Суранинг биринчи оятидаги “ҳумаза” сўзи унга ном бўлиб қолган. “Ҳумаза” сўзи “ғийбат билан одамларнинг обрўсини кўп тўкувчи” деган маънони англатади.

بِسْمِ اللّٰهِ الرَّحْمٰنِ الرَّح۪يمِ

РАҲМОН ВА РАҲИМ БЎЛГАН АЛЛОҲ НОМИ БИЛАН

وَيْلٌ لِكُلِّ هُمَزَةٍ لُمَزَةٍۙ (١)

1. Кишилар орқасидан ғийбат қилувчи, олдида масхара қилувчи ҳар кимсанинг ҳолига вой бўлсин!

اَلَّذ۪ي جَمَعَ مَالًا وَعَدَّدَهُۙ (٢)

2. У мол-дунёни йиғиб, уни санаб турар эди.

يَحْسَبُ اَنَّ مَالَهُٓ اَخْلَدَهُۚ (٣)

3. Топган моли уни дунёда абадий қолдиради деб ўйлаб юрар эди.

كَلَّا لَيُنْبَذَنَّ فِي الْحُطَمَةِۘ (٤)

4. Йўқ! Қасамки, албатта, у чилпарчин қилувчи ҳутамага ташланади!

وَمَٓا اَدْرٰيكَ مَا الْحُطَمَةُۜ (٥)

5. Эй инсон, чилпарчин қилувчи ҳутама нима эканлигини сенга нима билдирди?!

نَارُ اللّٰهِ الْمُوقَدَةُۙ (٦)

6. У ёқиб қўйилган Аллоҳнинг бир оловидир.

اَلَّت۪ي تَطَّلِعُ عَلَى الْاَفْـِٔدَةِۜ (٧)

7. У олов баданларни тешиб ўтиб юракларга қадар етади.

اِنَّهَا عَلَيْهِمْ مُؤْصَدَةٌۙ (٨)

8. Албатта, у олов уларнинг устидан қоплаб олгандир.

ف۪ي عَمَدٍ مُمَدَّدَةٍ (٩)

9. Ўзлари узун устунларда боғланган бўладилар.